अत्तरिया – सुदूरपश्चिमको तराइका जिल्लाबाट पहाडमा चल्ने साना सवारी साधनको छतमा ठेलमठेल सामान भर्ने गरिएको छ । पछिल्लो समय अत्तरिया हुँदै डडेल्धुरा, डोटी, अछाम, बझाङ लगायतका जिल्लामा चल्ने इभी गाडीहरूले छतमा क्षमताभन्दा बढी सामान बोक्ने गरेका छन् । दसैँ, तिहार, छठ पर्व सकिए पनि सुदूरपश्चिमका पहाडी जिल्लामा जात्रा (जात) को रौनक सुरु भएको अहिले पहाड जाने यात्रुको चाप बढेका बेला यसरी क्षमता भन्दा बढी यात्रु र सामान बोकिदा दुर्घटनाको जोखिम बढेको हो ।
८/१० जना मात्रै यात्रु बोक्ने क्षमताका यस्ता साना गाडीमा छतमा धेरै लोड राखिदा पल्टिने वा दुर्घटना हुने जोखिम बढी हुने गरेको यातायात व्यवसायी पदम सापकोटाले बताए । सुदूरपश्चिम यातायात प्रालिका अध्यक्ष समेत रहेका उनले साना गाडी पहाडी जिल्लाको लामो रुटमा यात्रु बोकेर चलाउन नै जोखिम भएको बेला ओभर लोड सामान हालेर चलाउनु झन् जोखिम हुने बताए ।
‘विशेष गरेर इभी गाडीहरू पहाडको लामो रुटमा चलाउन उपयुक्त गाडी नै होइनन् । ब्याट्रीको भरमा चल्ने यी गाडीहरू फाइबरबाट बनेका हलुका हुन्छन् । यी गाडीको ब्याट्री कम भयो भने ब्रेक नै नलाग्ने हुन्छ’ उनले भने ‘यस्ता गाडी तराइका लागि उपयुक्त भए पनि लामो रुटमा पहाडमा जोखिमयुक्त हुन्छन् । त्यसैमा ओभर लोड सामान हालेर चलाउँदा गाडी दुर्घटना हुने जोखिम झन् बढ्छ ।’ उनले जोखिम बढी भएकाले आफ्नो यातायात प्रालिले पहाडको लामो रुटमा यस्ता गाडी चलाउन अनुमति नदिएको बताए ।
सुदूरपश्चिमका पहाडी जिल्लामा जात्राका लागि जाने यात्रुको चाप बढेसँगै अहिले अत्तरियाबाट दैनिक दर्जनौँको सङ्ख्यामा साना इभी गाडी यात्रु बोकेर जाने गरेका छन् । यस्ता गाडी वातावरण मैत्री भए पनि बढी नाफा कमाउने लोभमा क्षमता भन्दा बढी लोड हाल्दा जोखिम बढेको यात्रु दीपक चन्दले बताए । अत्तरियाबाट डडेल्धुराको यात्रा गरिरहेको उनले गाडी भित्र यात्रु भरेर गाडीको माथि अत्यधिक सामान राखिदा गाडी पल्टिने पो हो कि भन्ने डर लागिरहेको बताए । उनले सामान धेरै नहाल्नुस् भन्दा यात्रुकै सामान भएकाले कहाँ हाल्ने भनेर उल्टै हप्काउने गरेको बताए ।
नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय अत्तरियाका प्रमुख एसपी प्रेम बहादुर शाहीले गाडी भित्र बसेका यात्रुको सामान राख्न पाइने भए पनि व्यवसायी प्रयोजनको सामान राख्न नपाइने बताए । उनले यस्ता गाडीमा भित्र ठाउँ कम हुने भएकाले यात्रुको सामान छतमा राख्ने गरिएको भए पनि धेरै राख्न नहुने बताए । ‘व्यक्तिगत समान राख्न पाइयो धेरै सामान त राख्न पाइँदैन’ उनले भने ‘त्यसमा ८/१० जना अटाउन्न । व्यक्तिगत सामान भित्र हाल्न अटाउँदैन । ठ्याकै कति राख्न पाउने भन्ने मापदण्ड छैन ।’
यद्यपि सुदूरपश्चिमका तराइका जिल्लाबाट पहाडी जिल्लामा चल्ने साना गाडी मात्रै नभएर ठुला गाडीहरूले पनि यात्रुको भन्दा व्यवसायी सामान बोक्ने गरेका छन् । यसरी सामान बोक्ने क्रम चलिरहँदा पनि नियमित गर्ने निकाय भने सक्रिय हुन सकेको छैन ।
विशेष गरेर चाडपर्वका समयमा क्षमता भन्दा बढी यात्रु र सामान बोक्ने गरिँदै आएको छ । सुदूरपश्चिमको पहाडी जिल्लाहरूमा दसैँ तिहार मात्रै नभएर जात्राको बेला पनि निकै चहलपहल हुने गरेको छ । जात्राको समयमा पहाडी जिल्लामा रहेका विभिन्न शक्तिपिठहरुमा मेला लाग्ने पूजापाठ र बली चढाउने गरिन्छ ।
