बैतडी– बैतडीको सुर्नया गाउँपालिकामा लागेको तालाबन्दी २२ दिनसम्म पनि खुल्न सकेको छैन । गत असोज २४ गते जेन जी समुहका युवाहरुले गाउँपालिका कार्यालयमा लगाएको ताला २२ दिनसम्म पनि खुल्न नसकेको हो ।
युवाहरुले आफूहरुले माग गरेका सूचनाहरु उपलब्ध नगराएको भन्दै कार्यालयमा तालाबन्दी गरेका थिए । उनिहरुले आफूहरुले माग गरेका सूचनाहरु उपलब्ध नगराएसम्म तालाबन्दी नखोल्ने अडान राखेका छन, जसका कारण उनिहरुले हालसम्म पनि ताला खोल्न दिएका छैनन् ।
यसरी लामो समयसम्म ताला नखुल्दा सेवा प्रवाहमा समस्या भइरहेको छ । पालिकाबाट पाउनुपर्ने नियमित सेवा नपाउँदा आम सर्वसाधारण सेवाग्राहीलाई समस्या हुने भएकाले समयमा नै निकास खोजेर सहज वातावरण बनाउनुपर्ने स्थानीय जेवी कुँवरले बताए । ‘जेनजीका जायज मागहरूलाई पालिकाले सम्बोधन गर्नुपर्छ, यसअघि नै सूचना माग गरिएकोमा कर्मचारीहरूबाट समयमा नै उपलब्ध नगराउँदा समस्या देखिएको छ’ उनले भने ‘अहिले तालाबन्दी गरिएको विषयमा गहन छलफल गरी समयमा नै निकास दिनुपर्छ, सर्वसाधारणले पाउनुपर्ने सेवा बन्देज गरिनु हुँदैन ।’
गाउँपालिकाले यसबिचमा तालाबन्दी खोल्ने विषयमा बेलाबेला छलफल गरेको भए पनि सहमति हुन सकेको छैन । तालाबन्दी खोल्ने विषयमा आफूहरूले छलफल जारी राखेको गाउँपालिका उपाध्यक्ष मञ्जु बोहराले बताईन । केही बुँदाहरूमा सहमति हुन बाँकी रहेकाले छलफल निरन्तर भइरहेको उनको भनाई छ । गाउँपालिकाको हितको लागि र पालिकामा सुशासन कायम गर्नको लागि माग अघि सारिएको जेनजी अगुवा विशाल भट्टले बताए ।
गाउँपालिकासमक्ष अघि सारेका मागहरूलाई तुरुन्तै कार्यान्वयन गरिनुपर्ने आफूहरूको माग रहेको उनले बताए । ‘गाउँपालिकाका अध्यक्ष उपाध्यक्ष, प्रमुख प्रशासकीय अधिकृत, लेखापाल, सूचना अधिकारीसहितको उपस्थितिमा जिल्ला प्रशासन र जिल्ला समन्वयका पदाधिकारीको रोहबरमा हाम्रा मागहरू पुरा गरिनुपर्छ, केही मागहरू तत्कालै गर्न सकिनेछन्, ती मागहरू तत्काल पुरा गर्नुपर्ने र अन्य मागहरूलाई समय सीमा तोकेर पुरा गर्नुपर्छ, नत्र हाम्रो सहमति हुनेछैन’ भट्टले भने ।
