फिल्म ‘जनै हराएको मान्छे ः सम्बन्धका धागाहरू’ ले प्रिमियरमा पुगेका अधिकांशको मन जितेको छ । बुधबार नयाँ बानेश्वरस्थित वान सिनेमाजमा आयोजित प्रिमियरमा फिल्म हेर्ने अधिकांश दर्शक र कलाकारहरू भावुक बनेको निर्माणपक्षले जनाएको छ ।
प्रिमियरमा अग्रज कलाकार सुनील थापा, गायिका अञ्जु पन्त, वरिष्ठ छायांकार गौरीशंकर धुंजु, अभिनेता जितु नेपाल, कवि तथा गीतकार विप्लव प्रतीक, कलाकार कमलमणी नेपाल, लोकेन्द्र लेखक, अभिनेता किरण श्रेष्ठ र स्क्रिप्ट राइटर प्रदीप भारद्वाजलगायत फिल्म क्षेत्रका चर्चित व्यक्तित्वहरूको उपस्थिति थियो ।
उनीहरूले फिल्मले दर्शकको मन छुने र आँसु बगाउन बाध्य बनाउने प्रतिक्रिया दिएका छन् । फिल्मले बुवा, आमा र दाजुभाइबीचको पारिवारिक सम्बन्ध, सम्झना र जिम्मेवारीको कथालाई मार्मीक ढंगले प्रस्तुत गरेको छ ।
उपस्थित दर्शकहरूले फिल्मको कथासँग भावनात्मक रूपमा जोडिएको र यसले आफ्नै परिवारको याद दिलाएको प्रतिक्रिया दिए । कलाकारहरू केकी अधिकारी र गायिका अञ्जु पन्तलगायत फिल्म हेर्दा रोइरहेका देखिन्थे । ‘पूर्णबहादुरको सारंगी’ जस्तो सफल फिल्मपछि विजय बरालको मुख्य भूमिकामा रहेको यो वर्षको पहिलो फिल्म हो ।
पेपरक्लिपको ब्यानरमा निर्माण भएको फिल्मको निर्देशक हिमाल न्यौपाने हुन् भने निर्मातामा कमल न्यौपाने र विमल न्यौपाने छन् । फिल्मको कथा, पटकथा र संवाद भानुभक्त ढकालले लेखेका हुन् । यो फिल्म भदौ ६ गते शुक्रबारदेखि देशभरका सिनेमा घरहरूमा प्रदर्शन हुँदैछ । प्रदर्शनको पूर्वसन्ध्यामा फिल्ममा समावेश ‘आधा आधी सपना’ बोलको गीत पनि युट्युबमा सार्वजनिक गरिएको छ ।
