अत्तरिया- बाजुराको एक कुखुरा फार्ममा लागुऔषध फेला परेको छ । बिहीबार राति प्रहरीले बुढीगंगा नगरपालिका-७ वायल बस्ने २१ वर्षका बाबुराम खड्काको कुखुरा फार्ममा लागुऔषध फेला पारेको हो ।
जिल्ला प्रहरी कार्यालय बाजुराबाट खटिएको टोलीले गोप्य सूचनाको आधारमा कुखुरा फार्ममा खानतलासी गर्दा लुकाई छिपाई राखेको अवस्थामा ४१० मिलिग्राम लागुऔषध खैरो हिरोइन जस्तो देखिने धुलो पदार्थ, डिजिटल तराजु एक थान र ४१० मिलिग्राम लागुऔषध गाँजा जस्तो देखिने पदार्थ फेला पारेको जनाएको छ ।
उक्त पदार्थसहित बाबुराम र खप्तड छेडेदह गाउँपालिका–५ डोगडी बस्ने २६ वर्षका दीपक रावतलाई नियन्त्रणमा लिइएको र थप अनुसन्धान भइरहेको प्रहरीले बताएको छ ।
