धनगढी- धनगढीमा सशस्त्र प्रहरीले झण्डै ९ लाख मूल्यको अवैध कपडा बरामद गरेको छ । सशस्त्र प्रहरी बल नेपाल नम्बर ३४ गण हेड क्वाटर कैलालीले ८ लाख ७४ हजार मूल्यको अवैध कपडा बरामद गरेको हो ।
धनगढी उपमहानगरपालिका–२ बैयाबेहडी, सिएलमार्ट स्थित प्यासेजमा धोती र कुर्ता सुरुवाल ६ बोरामा प्याक गरी लुकाएर राखेको अवस्थामा सशस्त्र प्रहरी उपरीक्षक दलबहादुर पाण्डेको कमाण्डमा खटिएको टोलीले बरामद गरेको बताएको छ । बरामद गरिएका कपडा कैलाली भन्सार कार्यालय त्रिनगर पठाएको सशस्त्र प्रहरीले जनाएको छ ।
यसअघि शुक्रवार मात्र सशस्त्र प्रहरीले आधा करोड बढीका अवैध कपडा बरामद गरेको थियो । धनगढी उपमहानगरपालिका–४ उत्तरबेहडी इलाकाबाट ५७ लाख १८ हजार ५ सय रुपैयाँ बराबरका अवैध कपडा बरामद गरिएको थियो ।
