धनगढी- धनगढी उपमहानगरपालिकाका २७ जना महिला सम्मानित भएका छन् । फरक–फरक व्यवसायमा संलग्न महिलाहरुलाई थप हौसला प्रदान गर्ने उद्देश्यले सम्मान गरेको उपमहानगरले जनाएको छ । उनीहरुलाई नारी दिवसको अवसर पारेर सम्मान गरिएको हो ।
सम्मानित हुनेमा पोते बनाउने काम गर्दै आएका धनगढी–१ की नाजिया बानु, एकल महिला धनगढी–२ की अमनिकुमारी अवस्थी ओझा, फूलखेती तथा तरकारी खेती गर्दै आएकी धनगढी–३ की मीरा नेपाली रहेका छन् । त्यसैगरी सिलाइकटाई गर्ने ४ जना, होटेल तथा नास्ता पसल सञ्चालन गर्दै आएका ४ जना, बंगुरपालन गर्दै आएका २ जना, अटोरिक्सा चलाउँदै आएका २ जना र डेरी सञ्चालन गर्दै आएका १ जना सम्मानित भएका छन् ।
दुनाटपरी उद्योग सञ्चालन गर्दै आएका ३ जना, उद्योग सञ्चालन गर्दै आएका ३ जना र सामुदायिक विद्यालयबाट १२ कक्षामा उतीर्ण भएकामध्ये बासुदेव माध्यमिक विद्यालयका उत्कृष्ट छात्रा हीराकुमारी बिनाडी सम्मानित भएका हुन् । त्यस्तै एकल तथा अन्य तीन जना सम्मानित भएका छन् ।
