अत्तरिया – कैलालीको गोदावरी नगरपालिकामा सरकारी गाडी रातो नम्बर प्लेट प्रयोग गरेर दोहन गरेको पाइएको छ । नगरपालिकाले खरिद गरेका सरकारी गाडीमा सेतो नम्बर प्लेट प्रयोग गर्नुपर्ने भएपनि गोदावरीमा खरिद गरेको २ वर्ष सम्म पनि रातो नम्बर प्लेट प्रयोग गरेर दोहन गरेको पाइएको हो ।

यस्ता गाडी नगरपालिकाको शाखा प्रमुख, इन्जिनियर लगायतका कर्मचारीले चलाउँदै आएका छन । सरकारी गाडी रातो नम्बर प्लेट लगाएर व्यक्तिगत प्रयोग गर्दा पनि विरोध नहुने भएकाले यसरी दोहन गरिएको स्थानीयको आरोप छ ।

समाचार श्रोतका अनुसार यस्ता गाडी (मोटरसाइकल र स्कूटी) ५ वटा रहेका छन । यस विषयमा नगरपालिका सँग विवरण माग्दा भने सूचना दिन आनाकानी गरिएको छ । जिन्सी शाखा प्रमुख गणेश पनेरुले रातो नम्बर प्लेटका गाडी सञ्चालनमा रहेको स्वीकार गरेपनि विवरण दिन भने आलटाल गरेका छन ।

अत्तरिया अनलाइनले प्राप्त गरेको सूचना अनुसार भने हाल योजना शाखा प्रमुख महाजित साउद, भवन निर्माण तथा बस्ती विकास शाखामा कार्यरत इन्जिनियर, जनक खड्का, जिन्सी शाखा प्रमुख गणेश पनेरु लगायत ५ जनाले विगत २ वर्ष देखि सरकारी गाडी रातो नम्बर प्लेट टासेर चलाइरहेका छन । खरिद गर्ने बेलै टासिएको रातो नम्बर प्लेट गाडी रिन्यू नै नगरी सञ्चालन गरिएका छन । त्यसमध्ये केही सवारी साधन भने खरिद गर्ने बेलै टासिएको रातो नम्बर प्लेट गाडी रिन्यू नै नगरी सञ्चालन गरिएका छन । त्यसमा केही कर्मचारीको लाइसेन्स समेत नभएको बुझिएको छ ।
यसरी सरकारी गाडीमा रातो नम्बर प्लेट हालेर चलाउँदा दुरुपयोग भएको थाहा नहुने भएकाले यसो गरिएको आशंका गरिएको छ । गाडीमा रातो नम्बर प्लेट प्रयोग गरेपनि तेल भने नगरपालिकाबाटै प्रयोग गरिदै आएको छ ।
