कञ्चनपुर- कञ्चनपुरमा लागुऔषधसहित तीन जना पक्राउ परेका छन् । भीमदत्त नगरपालिका-४ स्थित २ नम्बर गल्लीबाट सोही ठाँउका १८ वर्षीय किशोरसहित दुई जना पक्राउ परेका हुन् ।
उनीहरुलाई ०.२४ ग्राम लागुऔषध खैरो हिरोइनसहित वडा प्रहरी कार्यालय महेन्द्रनगरबाट खटिएको प्रहरी टोलीले पक्राउ गरेको हो ।
यस्तै, कृष्णपुर नगरपालिका-८ रैकवार बिचुवाबाट ३.४७ ग्राम लागुऔषधसहित सोही ठाँउका २८ वर्षीय हरिश भण्डारी पक्राउ परेका छन् । उनलाई आफ्नै घरमा सञ्चालन गरेको पसलबाट लागुऔषध फेला पारी पक्राउ गरेको प्रहरीले जनाएको छ ।
तीनै जनालाई प्रहरीले बुधबार साँझ पक्राउ गरेको बताएको छ । यसबारे थप अनुसन्धान गरिरहेको जिल्ला प्रहरी कार्यालय कञ्चनपुरले जनाएको छ ।
