धनगढी – सुदूरपश्चिम प्रदेशका पहाडी जिल्लामा हिमपात भएको छ । डडेलधुरा, डोटी, बैतडी, दार्चुला, बझाङ, अछाम र बाजुरा जिल्लाका उच्च पहाडी क्षेत्रमा हिमपात भएको हो ।
डडेलधुरा जिल्लाको सदरमुकाम आसपासका उच्च पहाडी क्षेत्रमा हिमपात भएको छख। यस्तै, बैतडीको खोड्पे, बझाङको काँडा, बाजुराको बुढीनन्दा तथा गौमुल, दार्चुलाको अपिनाम्पा, डोटीको खप्तड क्षेत्रमा हिमपात भएको स्थानीयले जनाएका छन् ।
बैतडीको सिगासका किसान दानसिंह बोहराका अनुसार सोमबार रातिदेखि मौसममा बदली आएसँगै मंगलबार बिहानदेखि हिमपात भएको छ । वर्षा र हिमपातका कारण पहाडी क्षेत्रमा चिसो बढेको छ । चिसोका कारण जनजीवन प्रभावित भएको छ । चिसोले बालबालिका, दैनिक ज्याला मजदुरी गर्ने, वृद्धवृद्धा बढी प्रभावित भएका छन् ।
यसैबीच वर्षा र हिमपातले किसान भने हर्षित भएका छन् । लामो समयसम्म पानी नपरेका कारण हिउँदेबाली सुक्न लागेको बेला वर्षा र हिमपातले बालीनाली सप्रिने किसानको भनाइ छ । लामो समयपछि वर्षा भएकाले हिउँदे बाली र फलफूल सप्रिने आशा पलाएको किसान बोहराले बताए ।