धनगढी – जिल्ला प्रशासन कार्यालय कैलालीले जिल्लामा सञ्चालित आयोजनाको विवरण पेश गर्न आयोजना कार्यालयलाई निर्देशन दिएको छ । आयोजनाका नाममा जथाभावी चलेका क्रसरलाई व्यवस्थित गर्न गराउन कार्यालयहरूलाई सो निर्देशन दिएको हो ।
जिल्लामा आयोजनाका नाममा जथाभावी क्रसर संचालन भएको पाईएकोले नियन्त्रण गर्न जरूरी रहेको हुँदा कार्यालयले सोमबार भित्र विवरण पेश गर्न निर्देशन दिईएको सहायक प्रमुख जिल्ला अधिकारी यज्ञराज जोशीले बताए ।
आयोजना कहिले संचालन भएको? सम्पन्न हुने मिति, के कति नदिजन्य पर्दाथ (ढुंगा, बालुवा, गिट्टी) आवश्यक हो र कति मौज्दात रहेको छ भनेर विस्तृत विवरण माग गरिएको उनले बताए ।
प्रशासनले जिल्लामा अबैध रूपमा संचालनमा रहेका ४ क्रसर कम्पनिलाई बन्द गर्न निर्देशन दिई सकेको छ भने आयोजनाका नाममा जथाभावी संचालनमा रहेका क्रसरलाई नियन्त्रण गर्न विवरण माग गरिएको उनले बताए ।
उनले भने क्रसरलाई बन्द गराईदा विकास निर्माणमा अप्ठ्यारो हुन्छ । ठप्पै बन्द गर्न त भन्न सकिँदैन तर, कानुन सम्मत ढंगले आयोजनाका नाममा रहेका क्रसर जानुपर्छ ।
शुक्रबार सहायक प्रमुख जिल्ला अधिकारी यज्ञराज जोशी अध्यक्षतामा आयोजना कार्यालयका पदाधिकारी तथा कन्स्ट्रक्न संचालक लगायतसंग छलफल गरेका थिए ।