अत्तरिया – कैलालीको अत्तरियामा रहेको पिएफए स्पोर्टस् क्लबले खेलाडी छनौटका लागी आवेदन खोलेको छ । क्लबले गोदावरी नगरस्तरमा रहेका स्थानिय फुटबल खेलाडीहरुको छनौटका लागी आवेदन खोलेको हो ।
१५ देखी २५ वर्ष उमेर समुहका खेलाडीहरुको छनौट गरी नगरपालिकाको टिम निर्माण गर्ने योजनाका साथ गोदावरी नगरपालिकामा रहेका फुटबल खेलाडीहरुको छनौटका लागी आवेदन खोलिएको क्लबका अध्यक्ष अमित बरालले बताए ।
उनले छनौट गरीएका खेलाडीहरुलाई फुटबल सम्बन्धी विभिन्न तालिमहरु दिईनुका साथै उनिहरुको क्षमतामा सुधार ल्याउने अन्य विभिन्न क्रियाकलापहरु गरिने समेत उनले बताए ।
उनले नगरस्तरमा रहेका त्यस्ता खेलाडीहरुलाई नगरस्तरका तथा अन्य बाहिर हुने खेलकुद प्रतियोगीताहरुमा पनि समावेश गराईने बताए । आवेदन दिने अन्तिम मिति कार्तिक १४ सम्म रहेको उनले बताए ।
क्लबले नगरभित्र मात्रै नभई बाहिर पनि राष्ट्रियस्तरका प्रतियोगीताहरु सञ्चालन गरिसकेको छ । स्थानिय खेलाडीहरु उत्पादन गरी तिनिहरुलाई राष्ट्रिय तथा अन्तरराष्ट्रियस्तरका खेलाडीहरुसँग खेल्ने मौका दिन क्लबले वर्षेनी सुदूरपश्चिम राजधानी कप प्रतियोगीता आयोजना गर्दै आएको छ ।
यही क्लबको एकेडेमिबाट उत्पादित युवा खेलाडी हरिश राज भट्टले भर्खरै मात्र नेपालको १७ बर्षमुनिको उमेर समूहको राष्ट्रिय टोलिबाट एएफसी कप छनोट र साफ च्याम्पियनसिपमा खेल्नुका साथै १ गोल पनि गरेका थिए । स्थानीय युवाहरुको अगुवाइमा क्लबले विभिन्न सामाजिक कार्यहरु समेत गर्ने गर्दछ ।