अत्तरिया – नेपाली कांग्रेस कैलालीका विभिन्न कार्यसमिति तथा भातृसंगठनहरुलाई लेखा सम्बन्धी तालीम दिईने भएको छ । जिल्लामा रहेको कांग्रेसको लेखा सुपरिवेक्षण समितिले जिल्लामा रहेका सम्पुर्ण कार्यसमिति तथा भातृसंगठनहरुलाई लेखा सम्बन्धी तालीम दिने भएको हो ।
समितिको शुक्रबार अत्तरियामा सम्पन्न दोस्रो बैठकले उक्त निर्णय गरेको हो । लेखा सुपरिवेक्षण समितिका संयोजक टंक प्रसाद जोशीको अध्यक्षतामा बसेको बैठकले जिल्लामा रहेका नेपाली कांग्रेसका सम्पुर्ण कार्यसमिति तथा भातृसंगठनहरुलाई लेखा राख्ने विषयमा जानकारी दिने निर्णय गरेको बताईएको छ ।
जिल्लाका सबै समितिहरु तथा भातृसंगठनहरुलाई लेखाको महत्व, लेखा कसरी राख्ने लगायतका विषयमा जानकारी दिनुका साथै त्यसको अनुगमन, नियमन लगायतका विषयहरुका बारेमा पनि जानकारी दिईने लेखा समितिका जिल्ला संयोजक जोशीले बताए ।
उनले देशभरमै पहिलो पटक कैलालीमा उक्त समिति गठन गरिएको बताए । उनले लेखा सम्बन्धीका सम्पुर्ण विषयमा जिल्लाका सबै कार्यसमिति तथा भातृसंगठनहरुलाई तत्कालै तालीमहरु दिईने बताए । उक्त समितिको सदस्यहरुमा हरि दत्त भट्टराई र लोकेन्द्र ऐर रहेका छन ।
