अत्तरिया – राष्ट्रपति रनिङ शिल्डमा कराँतेतर्फबाट गोल्ड मेडल र सिल्भर मेडल प्राप्त गर्ने कैलालीका खेलाडीहरुलाई सम्मानित गरिएको छ । बिहिबार राष्ट्रिय करातेँ दो संघ कैलाली शाखाले एक कार्यक्रमको आयोजना गर्दै जिल्लाको धनगढी उपमहानगरपालिका र गोदावरी नगरपालिकाका ४ जना खेलाडीहरुलाई सम्मानित गरेको हो ।
शाखाका अध्यक्ष धनन्जय कठायतको सभापत्विमा आयोजित कार्यक्रमका प्रमुख अतिथि गोदावरी नगरपालिकाका नगरप्रमुख विरेन्द्र भट्ट रहेका थिए भने विशिष्ठि अतिथिमा राष्ट्रिय कराँते दो संघ नेपालका केन्द्रिय महासचिव प्रकाश चन्द रहेका थिए । कार्यक्रममा बोल्दै नगरप्रमुख भट्टले खेलकुदले मानिसलाई स्वास्थ्य राख्न र अनुशासित बनाउन मद्दत गर्ने बताए । उनले खेलकुदका माध्यमल नै नगरको पहिचान हुने भएकाले खेलकुदका लागी नगरपालिका सदैव तत्पर रहेको बताए ।
आफु हिजोका दिनमा पनि खेलकुद को विकाशका लागी आवद्ध भएको बताउदै उनले आगामी दिनहरुमा पनि त्यसका लागी अग्रसर बन्न तयार रहने बताए । ‘हिजोका दिनमा पनि म तपाईहरुको साथमा थिए, आफुले गर्न सक्ने सहयोगको लागी हमेशा अग्रसर थिए’ उनले भने ‘आज पनि म तपाईहरुकै साथ मा छु, जुन आशा र अपेक्षा तपाईहरुले म प्रति गर्नुभएको छ, पक्कै पनि म तपाईहरुलाई निराश बनाउने छैन ।’ उनले प्रतियोगीतामा गोल्ड तथा सिल्भर मेडल प्राप्त गर्ने खेलाडीहरु भविष्यमा पक्कै पनि प्रगतीको पथमा अग्रसर हुने विश्वास लिएको बताए ।
यसैगरी कार्यक्रममा बोल्दै राष्ट्रिय गोजुरियो कराँते दो संघ नेपालका केन्द्रिय महासचिव प्रकाश चन्दले राष्ट्रियस्तरको प्रतियोगीतामा सुदूरपश्चिम प्रदेश कराँतेमा पहिलो पटक दोस्रो स्थान हासिल गर्न सफल भएको बताए । उनले कराँतेमा प्रदेशकै यो पहिलो सफलता भएको बताए । उनले कराँतेमा यस क्षेत्रबाट सम्भावनाहरु भएकाले स्थानिय सरकार भएको हैसियतले नगरपालिकाले यहाँका खेलाडीहरुको विकाशका लागी पहल थाल्नुपर्ने बताए । उनले कराँतेमा गोल्ड मेडल प्राप्त गर्ने खेलाडीहरुलाई संघको तर्फबाट नगद रु. १० हजार प्रदान गरिने समेत बताए ।
गत असार २८ गतेदेखी ३० गतेसम्म राष्ट्रपति रनिङ शिल्ड प्रतियोगीता आयोजना भएको थियो । प्रतियोगीतामा कैलालीको गोदावरी नगरपालिकाका पुजा सुनार र विष्णु बि.क ले मेडल प्राप्त गरेका थिए भने धनगढीका पुष्पा मडै र गरिमा मल्लले मेडल प्राप्त गरेका थिए । विष्णुले ४२ किलो तौल समुहबाट र पुष्पाले ४५ किलो तौल समुहबाट गोल्ड मेडल प्राप्त गरेका थिए भने पुजाले ४० किलो तौल समुहबाट र गरिमा मल्लले ५० किलो तौल समुहबाट सिल्भर मेडल प्राप्त गरेकी थिईन । यसैगरी प्रतियोगीतमा कोचको रुपमा रहेका जिल्ला खेलकुद समिति कञ्चनपुरका अध्यक्ष कुवेर खड्कालाई पनि सम्मानित गरिएको थियो ।
यसैबिच सोही कार्यक्रममा राष्ट्रिय गोजुरियो कराँते दो संघ नेपालका केन्द्रिय महासचिव चन्दले खेलाडी तथगा कोचलाई ट्रयाक सुट वितरण गरेका थिए । उनले प्रतियोगीतामा मेडल प्राप्त गर्ने खेलाडी र मेडल दिलाउन महत्वपुर्ण भुमिका निर्वाह गर्ने कोचलाई ट्रयाक सुट वितरण गरेका हुन ।
प्रतियोगीतामा सुदूरपश्चिमबाट विभिन्न ६ विधामा ११ जना खेलाडीहरु सहभागी भएका थिए । कराँतेतर्फ भने प्रदेशबाट १२ जना खेलाडीहरु सहभागी थिए । प्रतियोगीतामा सुदूरपश्चिम प्रदेश पहिलो पटक तृतिय स्थान हासिल गर्न सफल भएको थियो भने कराँतेमा द्धितिय स्थान हासिल गर्न सफल भएको थियो ।