बैतडी – बैतडीका २ जनाले सामाजिक सुरक्षा भत्ताको दोब्बर रकम फिर्ता गरेका छन ।
जिल्लाको डिलाशैनी गाउँपालिका र मेलौली नगरपालिकाका १/१ जनाले सामाजिक सुरक्षा भत्ता वाफत पाएको रकमको दोब्बर रकम फिर्ता गरेका हुन ।
राष्ट्रिय परिचय पत्र विवरण संकलनका क्रममा तथा जिल्ला प्रशासन कार्यालयमा आएको गुनासोको आधारमा अनुसन्धान गर्दा १६ जनाले नागरिकतामा जन्म मिति बढाएर भत्ता लिइरहेको फेला परेको थियो ।
सोही आधारमा उमेर बढाएर भत्ता लिईरहेका २ जनाले हालसम्म पाएको भत्ताको दोब्बर रकम फिर्ता गरेको जिल्ला प्रशासन कार्यालय बैतडीका सुचना अधिकारी खगेन्द्र भारतीले बताए ।
उनले बाँकी १४ जनाको पनि प्रहरीले अनुसन्धान गरिरहेको र उनिहरुबाट पनि दोब्बर रकम असुल गरिने बताए ।