अत्तरिया – कैलालीको गोदावरी नगरपालिकाले ११ महिनामा ५० प्रतिशत बजेट खर्च गरेको छ । नगरपालिकाले चालु आर्थिक बर्ष २०७८÷७९ को ११ महिनामा कुल बिनियोजित १ अर्व २७ करोड ९० लाख ९३ हजार मध्ये ६४ करोड १७ लाख ३१ हजार खर्च गरेको हो । जुन कुन विनियोजित बजेटको ५० दशमलव १७ प्रतिशत हो । यद्दपी नगरपालिकाले चालु आर्थीक बर्षका लागि अनुमान गरेको भन्दा ११ महिनाको अवधिमा १२ प्रतिशत कम आम्दानी प्राप्त गरेको जनाएको छ ।
मंगलबार गोदावरी नगरपालिकाले आयोजना गरेको सार्वजनिक सुनुवाई कार्यक्रम नगरपालिकाको प्रगती समिक्षा प्रस्तुत गर्दै प्रमुख प्रशासकीय अधिकृत बसन्त कुमार खत्रीले जेठ मसान्त सम्म चालु तर्फ ४८ करोड २६ लाख ८८ हजार र पूँजीगत तर्फ १५ करोड ९० लाख ४३ हजार खर्च भएको बताए ।
नगरपालिकाले चालु आर्थिक बर्षमा संघिय सरकारबाट ८० करोड २५ लाख २२ हजार, प्रदेश सरकारबाट ४ करोड ४० लाख २९ हजार, स्थानीय राजश्वबाट ४ करोड ६० लाख, आन्तररिक आयबाट ११ करोड ८५ लाख ४२ हजार ५ सय र संचित कोषबाट २६ कारेड ४९ लाख ९९ हजार ५ सय गरी १ अर्व २७ करोड ९० लाख ९३ हजार बजेट प्राप्त हुने अनुमान गरेको छ । जसमध्ये ११ महिनाको अवधिमा संघिय सरकारबाट ७० करोड १४ लाख, ८४ हजार, प्रदेश सरकारबाट २ करोड २० लाख ६ हजार, स्थानीय राजश्वबाट ५ करोड ५० लाख ७८ हजार, आन्तरिक आयबाट ८ करोड ५४ लाख ५ हजार र संचित कोषको २६ करोड ६ लाख ३८ हजार गरी १ अर्व १२ कारोड ४६ लाख ११ हजार अर्थात ८७ दशमलव ९२ प्रतिशत आम्दानी प्राप्त भएको जनाएको छ ।
२५ किलोमिटर सडक कालोपत्रे
नगरपालिका भित्र ५ बर्षको अवधिमा २५ किलोमिटर सडक कालोपत्रे गरिएको छ । नगरपालिकाको प्रगती समिक्षा प्रस्तुत गर्दै प्रमुख प्रशासकीय अधिकृत खत्रीले ५ बर्षको अवधिमा २५ किलोमिटर सडक कालोपत्रे भएको बताए । नगरपालिकाले ५ बर्षकै अवधिमा १५० किलोमिटर सडक ग्राभेल गरिएको छ भने ४५ किलोमिटर सडकको ट्याक खोलेको जनाएको छ ।
प्रमुख प्रशासकीय अधिकृत खत्रीले सो अवधिमा गेडेपानीमा मोटरेबल पुल निर्माण गरिएको चैतन्यपुर पुल निर्माणाधिन अवस्थामा रहेको बताए । उनले ५ बर्षको अवधिमा ३ वटा भोलुङ्गे र २ वटा स्टिल पुल निर्माण गरिएको बताए ।
नगरपालिकाले साना ठूला गरी करिब १ किलोमिट ढल निर्माणको काम सम्पन्न गरेको जनाएको छ । प्रगती विवरणमा नगरपालिकाले खुटीया नदी र गोदावरी नदीमा कटान नियन्त्रणका लागि तारजाली लगाएको जनाएको छ । नगरपालिकाले शिक्षा क्षेत्रमा चालु आर्थिक बर्षमा मात्रै २ कोठे ४ विद्यालय भवन र ३ वटा शौचालय निर्माण गरेको जनाएको छ ।