कञ्चनपुर – कञ्चनपुरको भीमदत्त नगरपालिका झण्डै ४० करोड दायित्व बाँकी रहेको श्वेत पत्र जारी भएको छ । आइतबार नगरपालिकाले श्वेतपत्र जारी गरेको हो । विगतको कार्यपालिकाले जथाभावी खर्च गरेका कारण आर्थिक दायित्व बढी भएको नगर प्रमुख पदम बोगटीले बताए । पुँजीगततर्फ ३८ करोड ६८ लाख र चालुतर्फ ६५ लाख गरि ३९ करोड बढी दायित्व बाँकी रहेको श्वेत पत्रमा उल्लेख छ ।
विगतको स्थानीय सरकारले स्रोतको सुनिश्चितता नभई बोलपत्र आह्वान गरी ठेक्कापट्टा गरिएको, पटकपटक ठूलो आकारमा रकमान्तर गरिएको, स्रोतले धान्ने नसकिने आयोजनाहरूको विस्तृत परियोजना प्रतिवेदन बनाएका कारण आर्थिक दायित्व बढेको नगरपालिकाको आरोप छ । आन्तरिक स्रोतले धान्न नसकिने गरि कर्मचारी भर्ना गरेर आर्थिक व्ययभार बढाएको, इन्धन र मर्मत खर्चमा मितव्ययिता नअपनाइएको आरोप लगाइएको छ ।
उक्त दायित्व नगरपालिकाको आन्तरिक स्रोतबाट मात्रै नभ्याइने भएकाले प्रदेश र संघसककंग आग्रह गर्ने, अनियमितता छानविन र बोझिलो कर्मचारी संयन्त्रलाई आवश्यकताका आधारमा मिलाउने श्वेत पत्रमा उल्लेख छ ।