कञ्चनपुर – कञ्चनपुरको लालझाडीका विपन्न परिवारलाई सुरक्षित आवास हस्तान्तरण गरिएको छ । गाउँपालिकाको वडा नम्बर ५, बैजनाथ टोलमा सुरक्षित आवास परियोजना अन्तर्गत निर्माण भएका १० वटा घरहरू बुधबार विपन्न परिवारलाई हस्तान्तरण गरिएका हुन । लालझाडी गाउँपालिका, ह्याबिट्याट फर ह्युम्यानिटी नेपाल र निड्स नेपालको त्रिपक्षीय सम्झौता अन्तर्गत ६५ लाख ५० हजार रुपैयाँ लागतमा घरहरू निर्माण गरिएका थिए ।
आवास हस्तान्तरण कार्यक्रममा भूमि सम्बन्धी समस्या समाधान आयोग कञ्चनपुरका अध्यक्ष नेत्र प्रकाश पन्त, गाउँपालिकाका अध्यक्ष निर्मल राना, प्रमुख प्रशासकीय अधिकृत राजबहादुर सार्की लगायत स्थानीय जनप्रतिनिधि तथा विकास साझेदार संस्थाका प्रतिनिधिहरूको उपस्थिति थियो ।
सुरक्षित आवास कार्यक्रमले विपन्न परिवारको जीवनस्तर सुधार गर्ने विश्वास व्यक्त गर्दै आगामी दिनमा थप १२ वटा घर निर्माणको योजना रहेको जनाइएको छ । साथै, समुदायमा वित्तीय साक्षरता, खानेपानी, सरसफाइ तालिम तथा विपद् जोखिम न्यूनीकरणका कार्यक्रमहरू पनि सञ्चालन गरिएको छ ।
