धनगढी –सुदूरपश्चिम प्रदेशका पहाडी जिल्लामा जात्राको रौनक छाएको छ । प्रदेशका डोटी, बैतडी, दार्चुला, डडेल्धुरा, अछामलगायत जिल्लामा कात्तिक शुक्ल पक्षको सुरुवातसँगै जात्राको रौनक सुरु भएको हो । कात्तिक शुक्ल पूर्णिमासम्म सुदूरपश्चिमका विभिन्न मठमन्दिरमा जात्रा लाग्ने गर्छ ।
अछामको कमलबजार नगरपालिका–७ जामा गाउँमा लगातार १० दिनसम्म लाग्ने केदारनाथ मेला सुरु भएको छ । केदारनाथमा पूजाआजा सहित कार्तिक शुक्ल पञ्चमीदेखि चतुदर्शीसम्म मेला लाग्ने गर्छ । सुदूरपश्चिम प्रदेशकै प्रसिद्ध शक्तिपीठ उग्रतारा भगवती मन्दिरमा हरेक वर्ष मनाइने देहिजाँत अर्थात् उग्रतारा मेला भने मंसिर १ मा लाग्ने भएको छ ।
उग्रतारा क्षेत्र विकास समितिका अध्यक्ष तेजबहादुर साँकीका अनुसार हरेक वर्ष कार्तिक शुक्ल पूर्णिमाको रात रतेडी र दोस्रो दिन दिउसेडी मेला लाग्दै आएको छ । चौलोले प्रख्यात रहेको सुदूरपश्चिमको प्रसिद्ध बडाल जाँत आजदेखि सुरु हुँदैछ । आज दिउसेडी मेला लाग्ने वडाध्यक्ष मनोज देउवाले बताए ।
लाटा गन्याप देवताको भक्ति स्वरुप मनाइने चौलोले प्रख्यात बडाल जाँतमा स्थानीय बाजागाजा, भोक्कर, देवलहरूका भाला, गुर्जा, खुकुरी र तरबार हातहातमा समातेर खेलिने भएकाले उक्त मेलाले सुदूरपश्चिममा प्रसिद्धि पाएको छ । यसवर्ष उग्रतारा र बडालको मेला भर्नका लागि नेपाली कांग्रेसका सभपाति तथा पूर्वप्रधानमन्त्री शेरबहादुर देउवा पनि डडेल्धुरा पुगिसकेका छन् । देउवा मंसिर २ सम्म बस्ने कार्यक्रम रहेको नेपाली कांग्रेस डडेल्धुराले जनाएको छ ।
डडेल्धुराकै अजयमेरु गाउँपालिका ३ र ४ को मध्य भागमा लाग्ने जगन्नाथ मेला अर्थात् खोलेइ जात मंसिर ३ मा हुने भएको छ । मंसिर २ मा रतेडी र ३ गते दिसेडी हुने जगन्नाथ युवा क्लबका अध्यक्ष तारादत्त भट्टले जानकारी दिए ।
उता बैतडीको तल्लो स्वराड क्षेत्रअन्तर्गत पर्ने शिवनाथ गाउँपालिका–६ शिवनाथ धुरामा मेला लागिसकेको छ ।
त्यहाँ हरेक वर्ष कात्तिक सप्तमीको राति अर्थात रतेडी र अष्टमीका दिन अर्थात दिउसेडी मेला लाग्ने गरेको छ । उता सुदूरपश्चिम प्रदेश प्रख्यात धार्मिक एवं पर्यटकीयस्थल बडीकेदार धाममा कात्तिक २७ देखि तीन दिन मेला लाग्ने भएको छ । डोटीको दक्षिणी क्षेत्रमा अवस्थित बडिकेदार गाउँपालिका र बोगटान फुड्सिल गाउँपालिकाको संगमको रूपमा रहेको बडीकेदार धाममा २७, २८ र २९ मा मेला लाग्ने भएको हो ।
बैतडीको प्रसिद्ध मेलौली भगवती मन्दिरमा यही कात्तिक २९ र ३० गते ‘देहीजात’ मेला लाग्दै छ ।