काठमाडौं – क्यानडामा जारी त्रिकोणात्मक टी–ट्वान्टीमा नेपालले ओमानलाई पराजित गरेको छ। क्यानडाको किङ सिटीमा गएराति सम्पन्न खेलमा नेपालले ओमानलाई ३७ रनले पराजित गरेको हो। जितका लागि एक सय ७७ रनको लक्ष्य पाएको ओमानले १९ दशमलव एक ओभरमा सबै विकेट गुमाउँदै एक सय ३९ रनमा समेटियो।
ओमानलाई एक सय ३९ रनमा समेट्ने क्रममा नेपालका करण केसीले तीन विकेट लिए भने कुशल भुर्तेलले दुई विकेट झारे। रिजन ढकाल, दीपेन्द्र सिंह ऐरी र सन्दीप लामिछानेले समान एक–एक विकेट लिए ।
त्यसअघि टस हारेर पहिला ब्याटिङको निम्तो पाएको नेपालले निर्धारित २० ओभरमा छ विकेट गुमाउँदै एक सय ७६ रनको योगफल बनाएको थियो। नेपालका लागि गुल्शन झाले सर्वाधिक ४० रनको योगदान दिए। त्यसैगरी कुशल मल्लले ३० रनको योगदान दिए।
आसिफ शेख र अनिल शाहले समान २७–२७ रन बनाए। त्रिकोणात्मक टि ट्वान्टी सिरिजको पहिलो खेलमा नेपाल क्यानडासँग १४ रनले पराजित भएको थियो। सिरिजमा नेपालको यो दोस्रो र ओमानको पहिलो खेल थियो। नेपालले अब तेस्रो खेल भोलि क्यानडासँग खेल्नेछ।
